ከጸሎት እስከ ጸሎት

 

 

እንደተጠመቀ ከወንዝ እንደወጣ

የምወደው ልጄ የሚል ድምፅ መጣ

ልብሱ እንደረጠበ ገና ሳይደራርቅ

ጌታዬ ጸልዮ ሆነ ተአምር ድንቅ

ሰማይ ተከፈተ ታይቶ የማይታውቅ 

ተልዕኮን በጸሎት ጀምሮ የዘጋ

ይተጋ ነበረ መሽቶ እስኪነጋ

ማዳኑን ሲፈፅም እንኳ በመስቀል ላይ

አላቋረጠውም ወደ አብ መጸለይ 

ጎኑ እየተወጋ እየፈሰሰው ደም

አባቱን ማናገር እርሱ አላቋረጠም 

ውሃ ጥም ያልገታው 

ሆምጣጤ ያላስቆመው

አባቱ ሲጨክን መጣራት ያልተወው 

ለሰቀሉት ሰዎች ፈፅሞ የራራው

ኢየሱስ ብቻ ነው

ሕይወቱን በትጋት ፍፁም አደረገው

በፀሎት ጀምሮ በፀሎት ጨረሰው

ተፃፈ:- ዛሬ

እንኳን መረብ ጾም አደረ!

 

ሌሊቱን በሙሉ ስንደክም አደርን

ምንም ነገር ሳንይዝ እንዲሁ ባከንን 

ነገር ግን ጌታዬ አንተ ካለህበት

መረቡ ይሞላል ቃልህን ስታዝበት

እንኳን ለፍተን አደርን እንኳን መረብ ጾም አደረ

ዓሣው ተትረፍርፎ እስኪቀደድ ድረስ መች እናጠምድ ነበረ

አንተን የታዘዘ በረከቱ ይበዛል

ባዶ እጁን ቢያድርም ሞልቶለት ይውላል 

ከምንም ከሁሉም ትበልጥብኛለህ 

ያለኝን አስጥሎ ያስከትላል ስምህ 

ሳልበላው ሳልሸጠው ያጠመድኩትን 

አስትቶኛል ስራህ ገዝቶታል ልቤን 

ተፃፈ :- ዛሬ

ቀላል ነው!!!

 

ግጥም

ኃጢአት ለከበደው 

መሸከም ላቃተው

ቀንበሩ የለዘበ ሸክሙ የቀለለ

ፍፁም የሚያሳርፍ ወደኔ ኑ ያለ

ለሁሉ የሚያስብ አሸካሚ አለ 

ተፃፈ:- ዛሬ

መሸክም ሁሌም አለ ግን ጥያቄው የተሸከምነው ምንድነው የሚለው ነው? 

እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ። ቀንበሬን በላያችሁ ተሸከሙ ከእኔም ተማሩ፥ እኔ የዋህ በልቤም ትሑት ነኝና፥ ለነፍሳችሁም ዕረፍት ታገኛላችሁ፤ ቀንበሬ ልዝብ ሸክሜም ቀሊል ነውና። (ማቴ 11፥28-30)